حوار في صحيفة الجريدة السودانية

 : رابط العدد كاملا  

https://aljareeda-sd.net/en/day/#7

تدشين المجموعة الشعرية

مجموعة أبنوسية العينين الشعرية

غربه .. وبحث عن الإنسان المفقود

الغربه الحقيقيه هي (بالإضافه للبعد الجغرافي) أنك تحس انو أي شي حولك خارج سور بيتك بلا لون ولا طعم ولا رائحه . .
برغم أنك عايش في ما يسمى بالعالم الأول .. لا تحمل هم كهرباء ولا مويه تقطع ، لا تحمل هم علاج أو مواصلات أو رسوم مدرسيه ، لا تخشى أن يعتقلك رجل أمن للونك السياسي ، ولا أن يبتزك عسكري مرور ، لا توجد صفوف بنزين او رغيف ، برغم كل ذاك وأكثر إلا أن ذلك الفراغ في داخلك يزداد اتساعاً ..
نعم .. نحمد الله ونشكر فضله على ماسبق ذكره وعلى غيره من النعم .. ولكن يزداد يقيني أن الإنسان هو ما افتقده في خضم هذا الزحام ..
الفردانيه تحكم هذا الجزء من العالم .. من الممكن وببساطة أن تعيش وحدك .. وتمشي وحدك. . وتموت وحدك ولا يشعر بك احد .. ولا تدري إن كنت ستبعث وحدك ..
فرغم كل من يحيط بك من بشر .. تظل وحيدا .. قد تتبادل الأحاديث مع البعض .. تضحكون .. تعلقون على أمر ما .. بل وحتى من حين لآخر تتشاركون وجبة أو تفاصيل أين سيقضي كل منكم إجازته ، أو ماذا فعل ابناؤكم وغيرها من الحوارات التي تجعل العلاقه تبدو في ظاهرها حميمية ، لكن بالسوداني كده (حدّكم الباب) ، أو نهاية اليوم .. لتعود وحدك. . أعني ليس هناك تطور في شكل العلاقه. . وممكن تستمر كده بالسنين ..
تتلاقوا الصباح في الشغل بدون سلام كأنك كنت بايت معاهم . .مجرد نظرات خاوية لا معنى لها .. وجوه جامده 😑 .. حليل السلام بالأحضان مع ناس خالد ووليد وإبراهيم .. والابتسامات والضحكات المليانه كلام . . تلك الأوجه المطمئنه .. بمجرد مروري على هذه الذكريات في هذه اللحظه غمرني دفء وشملتني سكينه وشحنت بطاريتي ليومين تاني ..
الموجع في الأمر انو عدوى هذا الأمر انتقلت للسودانيين (إلا من رحم ربي ).. فأصبحوا (خواجات) .. نعم المسألة مثل الداء الخبيث ممكن تتسرب إلى خلاياك دون أن تشعر حتى تجد نفسك يوما قد تقوقعت في حلقة ضيقه ، وتعود اللفتات البسيطه بالنسبه لك مرهقه. . نعم تمت خوجنتك بنجاح. .
الأكثر إيلاما هو انو اختلاف الثقافة واللغه والبيئه بينقص درجة الاستمتاع بالحاجه. . يعني حتى النكته البحكوها ممكن تفهمها كلغه لكن كمضمون ممكن تجلي منك لأنو المضمون بعتمد على أبعاد تانيه ..
ياخ مرات يجيك موقف ولا مشهد ولا أي حاجه ، يجي قصاده في رأسك مقطع من أغنيه لوردي ولا إبراهيم عوض ولا حتى بيت شعر للفيتوري أو أحمد شوقي ، لكن تقوله لي منو ! من يشاركك هذا الشعور ! لا أحد . .
باختصار .. الإنسان مفقود في هذه المنظومه (ما قصدي طبعا الإنسان كحقوق وواجبات .. دي مقطعنها ) .. الإنسان الصديق القريب منك بكل المعاني السمحه البتجي في بالك ..
سيدنا الطيب صالح لخص الكلام ده على لسان (الطاهر ود الرواس) في مقولته الشهيره : (الإنسان يا محيميد .. الحياه يا محيميد مافيها غير حاجتين اتنين. . الصداقه والمحبه .. ماتقول لي لا حسب ولا نسب ولا جاه ولا مال .. إبن آدم إذا كان ترك الدنيا وعنده ثقة إنسان واحد يكون كسبان ...الخ) .
وبما انو ماقدرنا نحقق كلام محجوب شريف القائل :
معاك انتظاري ولو بالكفاف ..
وعنك بعيدا أبيت الرحيل ..
وبيك اعتزاز الصباح الجميل ..
فرحلنا وابتعدنا جغرافياً ، وها نحن نعاني آلام الرحيل ..
عشان كده ..
ليت لي إزميل فدياس وروحاً عبقريه
وأمامي تل من تراب وبعض ماء ..
لنحتُّ وطني كيف أريد . .
وعندها أقول ..
عندي وطني بقضيلي حاجه
كيف اسيبه واروح لي خواجه
يغنى وطني ويحيجني حاجه
لي عدوك يا وطني العزيز ..
#هاني
#فضفضه_رمضانيه

مايو 2018

مزاج التكييف

 

الأثر السلبي لارتفاع درجات حرارة الطقس على سلوك الإنسان مثبت في علم النفس ..
- مشهد أول : المجمع الجديد للسجل المدني في الخرطوم ..
مشينا نجدد جواز الآنسة مريم .. وكالعادة قلبت مناحه 😭 لأنها ماعايزه تتصور 📷 .. بس كده 😑.
كل العساكر الشافوها بتبكي (رجال ونساء) أبدوا تعاطفهم وهاك يا الابتسامات والتحانيس. . والزوله الماسكه التصوير في الكاونتر تديها في البسكويت 🍪 والمناديل والتحانيس مستمره ، وفي الآخر دخلتها معاها ورا الكاونتر وفتحت ليها الموبايل وورتها صور أولادها وبناتها 👫 وبالاسماء كمان. . المهم في النهايه تمكنا من الحصول على صورة كويسه. . طول المده دي مافي زول جاط أو اتنرفز أو حتى كشّر لينا ..
كلمة السر : التكييييف ❄❄ ..
- مشهد تاني : مجمع سجلات المواليد والوفيات (شارع المك نمر).. 

يعني شنو: تبع الشرطه برضو.
مشيت اغير شهادة ميلاد عزه ..
المنظر من الباب غير مبشر 😣 ..
زحمه .. خلق كتار .. صفوف تمتد من داخل المكاتب الضيقه الباليه إلى فناء المركز ولطول تلك الصفوف اتخذت أشكالا ومنحنيات في محاولات للاحتماء من حر الهجير ☉🌡والاتقاء بذلك الظل المتقاصر. .
جوطه. . عساكر زهجانين وعرقانين😓 .. يطردوا المواطنين من الصالات والمكاتب(انت يا سيد 👈 اطلع لينا بره) .. وجوه مكفهره. . أخلاق ضيقه. . وقبل نهاية الدوام بحوالي ساعتين وقفوا الإجراءات في المكتب (الانا قاعد منتظرو) وقالوا : تعالوا الاحد😨😰😱 ..
الوحيد الكان مبتسم وهاديء برغم الزحمه الفي مكتبه هو سيادة العقيد 👮.. السبب شنووو. .. اكيييد التكييييف ❄❄ الضارب فوق رأسه من دون باقي المكاتب ..
- خروج: برغم اليوم الضائع من غير إنجاز يذكر لكن الممتع كان هو الحوارات والتعليقات والقفشات التي تدور عادة بين الواقفين في الصفوف بمختلف خلفياتهم ومشاربهم. . ممكن يتكتب فيها كتاب .. دايره ليها بوست منفصل. ..

وصل

وحكى أحمد بن الفضل : أن غلاماً وجارية كانا في كُتّاب فعشق الغلام الجارية 💘، ولم يزل يتلطف بمعلمه حتى قربه إليها ، فكتب الغلام في لوح الجارية هذا البيت :

ماذا تقولينَ فيمنْ شـفّـه سـقـم ... منْ طولِ حبّك حتّى صارَ حيرانا

فقرأته الجارية وذرّفت عيناها بالدموع 😭 رحمة له ، وكتبت تحته :
إذا رأينا محبّاً قدْ أضـرَّ بـه ... طولُ الصبابةِ أوليناهُ إحسانا

فقدم المعلّم ، وسمع ذلك ، فأخذ اللوح وكتب فيه هذين البيتين :

صِلي العريفَ ولا تخشينَ منْ أحدٍ ... إن العريفَ صغيرُ السنِ ولهانا
أمّا الفقيهُ فما يسـطـوا إذاً أبـداً ... لأنّه قدْ بُلي بالعشـقِ ألـوانـا

#عالم_لامتناهي_من_الرقّه😃
#والمعلم_طلع_هو_زاتو_ممكون_سابق💘